Ti do e mposhtësh Jerikon tënd (2)
18. korrik e shtunë
“Ndërsa Jozueu ishte afër Jerikos, ngriti sytë dhe shikoi, dhe ja, një njeri i qëndronte përpara” Jozueu 5:13
Në fund të janarit të vitit 1956, Dr. Martin Luther King, Jr. mori një thirrje telefonike kërcënuese në shtëpinë e tij. Nuk ishte mesazhi i parë shqetësues që ai kishte marrë. Por atë natë, ndërsa fëmijët dhe gruaja e tij flinin, pesha e Lëvizjes për të Drejtat Civile ishte tepër e madhe. Ai vendosi se rreziku ishte shumë i madh. Filloi të hartonte një strategji daljeje. Në mesnatë u përkul mbi tryezën e kuzhinës dhe filloi të lutej: “Kam frikë. Njerëzit po shikojnë tek unë për udhëheqje dhe nëse qëndroj para tyre pa forcë dhe guxim, edhe ata do të dështojnë. Jam në fund të fuqive të mia. Nuk kam më asgjë. Kam arritur në pikën ku nuk mund të përballem vetëm”. King përshkroi atë që ndodhi më pas: “Përjetova praninë e Hyjnorit si nuk e kisha përjetuar kurrë më parë. Duket sikur dëgjova sigurimin e qetë të një zëri të brendshëm që thoshte: ‘Qëndro për drejtësi, qëndro për të vërtetën; dhe Perëndia do të jetë pranë teje përgjithmonë’”.
Kur u përball me një sfidë të frikshme, Dr. King e ndryshoi fokusin e tij dhe u kthye tek Perëndia. Bibla thotë: “Ndërsa Jozueu ishte afër Jerikos, ngriti sytë dhe shikoi, dhe ja, një njeri i qëndronte përpara”. Pasi Jozueu ngriti sytë nga Jerikoja, një i dërguar hyjnor qëndronte përpara tij me zgjidhjen e problemit të tij. Për sa kohë sytë e tu janë drejtuar vetëm tek problemi yt, nuk do të shohësh zgjidhësin e problemit. Duhet të ngresh sytë lart. “Unë i ngre sytë nga malet; nga do të më vijë ndihma? Ndihma më vjen nga Zoti, që ka bërë qiejtë dhe token” (Psalmi 121:1-2).
